नेपालगञ्ज-ठाकुरद्वारा पर्यटन बस सुरु

अर्थ

गृहपृष्ठ
अर्थ
नेपालगञ्ज-ठाकुरद्वारा पर्यटन बस सुरु

नेपालगञ्ज-ठाकुरद्वारा पर्यटन बस सुरु

शुक्रबार, फागुन १४, २०७७ बागेश्वरी पोस्ट

नेपालगञ्ज । नेपालगञ्ज-ठाकुरद्वारा पर्यटन बस सेवा सुरु भएको छ । नेपाल एसोसियसन अफ टुर एण्ड ट्राभल एजेन्ट (नाट्टा) बाँकेले आजदेखि नेपालगञ्ज-ठाकुरद्वारा पर्यटन बस सञ्चालनमा ल्याएको हो ।

नेपालगञ्ज उपमहानगरपालिकासंगको सहकार्यमा नाट्टा बाँके च्याप्टरले आन्तरिक पर्यटकको सुविधालाई मध्यनजर गरेर बस सेवा शुरु गरेको हो । बस सेवाको आज एक कार्यक्रमका बीच नेपालगञ्जका मेयर डा. धवल शमशेर राणाले उद्घाटन गर्नुभयो । पर्यटन प्रवर्द्धनका लागि सबैको हातेमालो जरुरी रहेको मेयर डा. राणाले बताउनुभयो । उपमेयर उमा थापा मगरले पर्यटन प्रवर्द्धनका लागि निजी क्षेत्रको अहम् भूमिका रहेको बताउनुभयो ।

उद्घाटन कार्यक्रममा पर्यटन प्रवर्द्धन मंच बाँकेका अध्यक्ष कृष्ण प्रसाद श्रेष्ठ, नेपालगन्ज उद्योग बाणिज्य संघका उपाध्यक्ष आदेश अग्रवाल, होटल व्यवसायी संघका अध्यक्ष भिम कँडेलले नाट्टाले ठाकुरद्वारामा पर्यटन बस संचालन गरेर राम्रो सुरुवात गरेको बताउनुभयो । स्वीफ्ट होलिडे कम्पनीले उपलब्ध गराएको बस नाट्टाले सञ्चालन गर्न लागेको हो । पर्यटन बस सञ्चालनपछि नेपालगञ्ज आउने पर्यटकका लागि ठाकुरद्वारा र त्यहाँ आउने पर्यटकलाई नेपालगञ्ज ल्याउन व्ववसायीहरुका लागि सहज हुने विश्वास नाट्टाको छ ।

नाट्टा बाँके च्याप्टरका अध्यक्ष श्रीराम सिग्देलले पहिलो चरणमा आजदेखि हप्तामा एक दिन बस चलाइने जानकारी दिनुभयो । निजी गाडी वा भाडामा एक्लै गाडी लिएर जाँदा महंगो नपरोस् भनेर सुविधा सम्पन्न पर्यटक बस सञ्चालनमा ल्याइएको सिग्देलले बताउनुभयो । नेपालगञ्जबाट छुट्ने बस बर्दियाको मैनापोखर, बढैयाताल, गुलरिया, मधुवन, ओरालीबजार हुँदै ठाकुरद्वारासम्म पुग्नेछ । हरियो नम्बर प्लेटको पर्यटक बसमा सहज यात्रासंगै सहुलियत भाडाको व्यवस्था मिलाइएको सिग्देलको भनाई छ ।

यसपछि सुपादेउराली, लुम्बिनी, कर्णालीका विभिन्न स्थानमा पनि सुविधा सम्पन्न गाडी सञ्चालनमा ल्याउने योजना रहेको नाट्टा बाँकेले जनाएको छ । नाट्टाले गत सातादेखि मात्र नेपालगञ्ज पोखरा नेपालगञ्जका लागि चार्टर विमान सञ्चालन गरेको छ ।

No description available.