पार्टीको झन्डा फहराउने ठाउँ मेलम्ची होइन, लिम्पियाधुरा

बिचार

गृहपृष्ठ
बिचार
पार्टीको झन्डा फहराउने ठाउँ मेलम्ची होइन, लिम्पियाधुरा

पार्टीको झन्डा फहराउने ठाउँ मेलम्ची होइन, लिम्पियाधुरा

आइतबार, असार ६, २०७८ धर्मेन्द्र झा

अहिले नेपालका केही ठाउँमा राहत राजनीति जोडतोडले चलेको कन्टिर–बाबूको ठम्याइ छ । मधेसतिर एक भनाइ प्रचलित छ– छौडा–छौडी ताकए बाटघाट कखन हेतै भोजभात । अर्थात कसै–कसैको ध्याउन्न कुन बेला भोज खान पाइन्छ भन्नेमै केन्द्रित हुन्छ ।

कन्टिर–बाबूलाई लाग्छ– विभिन्न नाममा राहत बाँड्न खोज्नेहरू पनि यस्तै हुन् । सुत्केरीको निहुँ पारी टाउको खान पल्केकाहरू यस्ता घटना भइरहुन् र आफूहरूलाई राहत बाँड्ने अवसर प्राप्त भइरहोस् भन्ने चाहन्छन् । यी राहत वितरकहरू उपत्यकाका त्यस्तै पत्रकारजस्ता हुन्, जो प्रत्येक बिहान आज कुन तारे होटलमा कार्यक्रम छ भनेर खोजी गर्ने बानी परेका छन् ।

अरे यार, हुनु त के पर्ने हो भने राहत वितरण गर्नुपर्ने अवस्था नै नआओस् । यस्तो अवस्था आउँदा सबैलाई दुःख लागोस् । तर नेपालमा उल्टो भइरहेको छ । यहाँ केही मानिस यस्तो विषम अवस्था निरन्तर आइरहोस् भनी भगवानसँग प्रार्थना गर्नेहरू पनि छन्, जसको प्रतिबिम्ब कतिपय राहत वितरण गर्नेहरूको मुहारमा झल्किरहेको खुसीमा देख्छन् कन्टिर–बाबू ।

मेलम्चीका बाढी–पीडितलाई राहत बाँड्ने सन्दर्भमा पार्टीको झन्डाको विषयलाई लिएर दुई समूहबीच मारमुङ्ग्री नै भयो । हैट्, राजनीति !

कन्टिर–बाबू भन्छन्– यतिमात्र कहाँ हो र ! राहतलाई भोटको राजनीतिसँग जोड्न खोज्नेहरूको पनि यहाँ कुनै कमी छैन । केही व्यक्ति पार्टीको झन्डा लिएर राहत वितरण गर्न गएका उदाहरण पनि छन् । नगरपालिका वा गाउँपालिकको खर्चमा वितरण गरिएको चामलको बोराभित्र जनप्रतिनिधिआबद्ध दलको पर्चा भेटिएको घटना पनि सार्वजनिक भएकै छन् ।

ले घाँस ! अस्ति मेलम्चीका बाढी–पीडितलाई राहत बाँड्ने सन्दर्भमा पार्टीको झन्डाको विषयलाई लिएर दुई समूहबीच मारमुङ्ग्री नै भयो । हैट्, राजनीति !

कन्टिर–बाबूको प्रश्न छ– कहिल्यै तोरीको फूल नदेखेकाहरू, दुःख परेको ठाउँमा तिमीहरू झन्डा फहराउन गा’को कि राहत बाँड्न ? ए अधकपारीहरू हो, झन्डै फहराउनु छ भने लिम्पियाधुरामा गएर फहराओ न, मेलम्ची किन जानुपर्‍यो ?

प्रकाशित मिति: आइतबार, असार ६, २०७८ १६:३७