धारा नेपालगन्ज म्याराथनका प्रायोजकहरु उत्साहित

अर्थ

गृहपृष्ठ
अर्थ
धारा नेपालगन्ज म्याराथनका प्रायोजकहरु उत्साहित

धारा नेपालगन्ज म्याराथनका प्रायोजकहरु उत्साहित

शनिबार, पुस ५, २०७६ बागेश्वरी पोस्ट

नेपालगन्ज । पाँचौं धारा नेपालगन्ज म्याराथनको सफल आयोजनाबाट साझेदार तथा सरोकारवाला उत्साहित बनेका छन् ।
आयोजक क्रियटिभ ह्याण्ड्सले आयोजना गरेको समिक्षा तथा कदर पत्र वितरण कार्यक्रममा मुख्य प्रायोजक केएल दुगड ग्रुपका महाप्रबन्धक प्रदीप छाजेडले आफुले सोचेको भन्दा म्याराथन उच्च स्तरको भएको बताए । ‘हामीले दुई बर्षका लागि सम्झौता गरेका हौं, तर भव्य आयोजनाबाट हामी निकै उत्साहित छौं र निरन्तरता दिने सोंच बनाइसकेका छौं ।’ उनले भने –‘बोर्ड बैठकमा यसबारेमा छलफल हुनेछ र स्पोन्सर रकम बृद्धि गरी अघि बढ्ने बारेमा निर्णय हुनेछ ।’ केएल दुगड ग्रुप अन्तर्गत सौरभ आयल मिलको उत्पादन धारा तेल यस बर्षदेखि नेपालगन्ज म्याराथनको टाइटल स्पोन्सरका रुपमा अघि आएको छ ।

त्यसैगरी सहप्रायोजक आशीर्वाद पेन्ट्सका अध्यक्ष किरण गिरीले नेपालगन्ज म्याराथनसँगको साझेदारीलाई निरन्तरता दिइने बताए । ‘हामी सानो रकमबाट जोडिएका हौं, यसले दिएको माइलेजबाट हामी निकै खुशी छौं ।’ उनले भने–‘हाम्रो साझेदारीले निरन्तरता पाउनेमा बिश्वास दिलाउन चाहन्छु ।’ अर्को सहप्रायोजक संस्था राष्ट्रिय वाणिज्य बैंकका प्रदेश कार्यालय प्रमुख आनन्द सुवेदीले नेपालगन्ज म्याराथन पश्चिम नेपालको ब्रान्डका रुपमा स्थापित हुन खोजेको हुँदा आफुहरु सदैव सहकार्य गर्ने बताए ।

कर्यक्रममा भेरी नर्सिङ कलेजका प्रबन्ध निर्देशक सञ्जय सिंहले क्रियटिभ ह्याण्ड्सले नेतृत्व गरेका हरेक कार्यक्रमबाट आफु निकै प्रभावित भएको बताउँदै आर्थिक, भौतिक र नैतिक सहयोग गर्ने वचन दिए । ‘यस बर्ष सानो रकमबाट साझेदारीको सुरुवात गरेका छौं, हामी यो भन्दा ठुलो सहयोग गर्ने प्रतिवद्धता जनाउँछौं ।’ उनले भने –‘विद्यार्थीको सहभागितादेखि आर्थिक सहयोगमा मेरो पुर्ण साथ रहनेछ ।’ हिसान बाँकेका अध्यक्ष तथा ब्राइटल्याण्ड कलेजका निर्देशक डा अवनिन्द्र मिश्रले क्रियटिभ ह्याण्ड्सका हरेक कार्यक्रम क्रियटिभ नै हुने गरेकोमा हिसान र ब्राइटल्याण्ड कलेज सदैव साथमा रहने चर्चा गरे । ‘मलाई पछुतो भइरहेको छ ।’ उनले भने–‘यति भव्य कार्यक्रममा सोचेजति सहयोग गर्न सकेनौं कि?’

त्यसैगरी गोर्खा युनाइटेड पब्लिक स्कुलका संस्थापक निर्देशक केसर बहादुर आलेले नेपालगन्ज म्याराथन बर्षेनी आकार ठुलो लिंदै गरेको हुँदा अब सबैले सहकार्य गर्नुपर्नेमा जोड दिए । प्रदेश सांसद कृष्ण केसी नमुनाले आगामी बर्षदेखि प्रदेश सरकारको क्यालेन्डरमा राख्न पहल गर्ने बताइन् । नेपालगन्ज उपमहानगरपालिका उपप्रमुख उमा थापाले उपमहानगरले अपनत्व ग्रहण गरिसकेको जनाउँदै आगामी बर्षदेखि बजेटको दायरा बढाउँदै लैजाने बताइन् । कार्यक्रममा दैनिक नेपालगन्जका प्रधानसम्पादक झलक गैरे, मध्यपश्चिम क्षेत्रीय खेलकुद निवर्तमान अध्यक्ष भिम ओली लगायतले नेपालगन्ज म्याराथन प्रति बढ्दै गएको जनचासोका बिषयमा आयोजक पनि गम्भीर भएर अघि बढ्नुपर्नेमा सुझाव दिएका थिए ।

आयोजक क्रियटिभ ह्याण्ड्सका अध्यक्ष टीएस ठकुरीले छैटौं संस्करण आगामी मंसिर ६ गते हुने तय भएको जानकारी गराउँदै त्यसको तयारीमा जुटिसकेको बताए । आगामी महिनादेखि फर्म खुल्ला गरिने अध्यक्ष ठकुरीले जानकारी दिए । कार्यक्रममा सबै साझेदार तथा सहयोगीलाई कदरपत्रले सम्मान गरिएको थियो । पाँचौं धारा नेपालगन्ज म्याराथनको मुख्य प्रायोजक धारा शुद्ध तोरीको तेल, सहप्रायोजकमा आशीर्वाद पेन्ट्स र राष्ट्रिय वाणिज्य बैंक, अन्य साझेदारमा सिद्धार्थ हस्पिटालिटी ग्रुप, हाम्रो खेलकुद डट कम, नेपालगन्ज मेडिकल कलेज, निदान डायग्नोस्टिक सेन्टर, दैनिक नेपालगन्ज, मेरो टुकी प्रज्ञालय, क्रियटिभ बुक्स रहेका थिए ।

प्रकाशित मिति: शनिबार, पुस ५, २०७६ २३:१२