तुलसीपुरको टरिगाउँ विमानस्थलमा आजदेखि सीता एयरले उडान गर्दै

अर्थ

गृहपृष्ठ
अर्थ
तुलसीपुरको टरिगाउँ विमानस्थलमा आजदेखि सीता एयरले उडान गर्दै

तुलसीपुरको टरिगाउँ विमानस्थलमा आजदेखि सीता एयरले उडान गर्दै

शुक्रबार, माघ १३, २०७९ बागेश्वरी पोस्ट

नेपालगन्ज । दाङको टरिगाउँ विमानस्थलमा निजी विमानले सेवा कम्पनी सीता एयरले उडान भर्न लागेको छ । तुलसीपुर वडा नं १२ स्थित टरिगाउँ विमानस्थलमा आज सीता एयरले परीक्षण उडान गर्ने भएको छ ।

आज दिउँसो १ बजे सीता एयरको १९ सिटे जहाजले परीक्षण उडान भर्ने भएको तुलसीपुर उपमहानगरपालिकाका उपप्रमुख स्यानी चौधरीले बताइन् । 'निजी जहाजको पनि तुलसीपुर विमानस्थलमा उडान सुरु भएपछि भाडा पनि सस्तो हुने हाम्रो अपेक्षा छ', उपप्रमुख चौधरीले भनिन् ।

ठूलो सङ्घर्षपछि तुलसीपुर विमानस्थलमा निजी जहाजले सेवा दिन थालेपछि त्यहाँका बासिन्दाहरु खुशी बनेका छन् । त्यहाँ निजी कम्पनीका जहाजले सेवा दिन सुरु हुँदै गर्दा अब नेपालगन्ज पुगेर यात्रा गर्ने अन्त्य हुने तुलसीपुर उद्योग बणिज्य संघका पूर्व अध्यक्ष बिमल रिजालले जानकारी दिए ।

उपप्रमुख चौधरीका अनुसार अहिले धावनमार्गको डिपिआरको काम भइरहेको भन्दै त्यो सकेपछि तत्काल हालको धावनमार्गलाई विस्तार गरेर निजी कम्पनीका ठूला जहाज बसाल्ने योजना रहेको छ। धावनमार्ग विस्तार भएपछि ७२ सिटे जहाज बसाल्ने गरी आफूले तयारी गरेको चौधरीले बताइन् ।

हाल नेपाल वायु सेवा निगमको १९ सिटे ट्वीनअटर जहाजले तुलसीपुर विमानस्थलमा हप्तामा ४ दिन गरि आइबार, मङ्गलबार, बिहीबार र शनिबार उडान गरिरहेको छ । टरिगाउँबाटै इन्धन डिपो स्थापना भई सञ्चालनमा पनि आइसकेको छ । तर भाडा भने घट्न सकेको छैन । हाल दाङबाट काठमाडौँको न्यूनतम रु. ८ हजार आठ सय १० र काठमाडौँबाट दाङको भाडा न्यूनतम रु. ९ हजार बढीदेखि अधिकतम १२ हजार भन्दा बढी रहेको छ । तुलसीपुर विमानस्थलको कुल लम्बाई ७५० मिटर र ३० मिटर चौडाइ रहेको छ ।