कांग्रेसको उदार अर्थनीतिका कारण निजी क्षेत्रले फड्को मारेको होः राठौर

अर्थ

गृहपृष्ठ
अर्थ
कांग्रेसको उदार अर्थनीतिका कारण निजी क्षेत्रले फड्को मारेको होः राठौर

कांग्रेसको उदार अर्थनीतिका कारण निजी क्षेत्रले फड्को मारेको होः राठौर

शनिबार, माघ २८, २०७९ बागेश्वरी पोस्ट

नेपालगञ्ज । नेपाली कांग्रेसका सहमहामन्त्री किशोरसिंह राठौरले कांग्रेसले ल्याएको उदार अर्थनीतिका कारण मुलुक यो अवस्थासम्म आइपुगेको बताएका छन् । प्रजातान्त्रिक उद्योगी व्यवसायी संघ बाँकेको चौथो जिल्ला तथा प्रथम नगर अधिवेशनको आज नेपालगञ्जमा उद्घाटन गर्दै राठौरले कांग्रेसको अर्थनीतिका कारण नै मुलुकमा निजी क्षेत्रले फड्को मारेको बताए ।

उनले उद्योगी व्यवसायीका समस्यामा पार्टी संगसंगै रहेको उल्लेख गर्दै कांग्रेस निकट उद्योगी व्यवसायीहरुको संगठनलाई पनि पार्टीले शुभेच्छुक संगठनको मान्यता दिएको बताए । उनले पार्टी निर्माण र संगठन विस्तारमा उद्योगी व्यवसायीहरुको अहम् भूमिका हुने उल्लेख गरे । क्याडर बेस्ड पार्टीसंग प्रतिष्पर्धा गर्नुपर्ने भएकाले मास बेष्ड पार्टी कांग्रेसलाई धेरै चुनौती रहेको बताउँदै उनले पार्टीलाई अब सेमी क्याडर बेस्ड बनाउनुपर्नेमा जोड दिए ।

नेपाली कांग्रेसका बाँकेका सभापति नारायणप्रसाद गौडेलले उद्योगी व्यवसायीहरुसंग हातेमालो गरेर पार्टी अगाडि बढ्न प्रतिबद्ध रहेको बताउँदै समस्याहरुमा पनि संगसंगै रहने उल्लेख गरे । उनले पार्टी निर्माणमा उद्योगी व्यवसायीहरुको भूमिकाको सराहना गर्दै अब शुभेच्छुक संगठनका रुपमा अझ दरिलो साथको अपेक्षा गरे । उपसभापति गोपालप्रसाद अधिकारीले आफू व्यवसायी पृष्ठभूमीबाटै पार्टी राजनीतिमा अघि बढिरहेको उल्लेख गर्दै निजी क्षेत्रसंग सहकार्य गर्न कुनै कञ्जुस्याइँ नगरिने बताए । प्रजातान्त्रिक उद्योगी व्यवसायी संघ निर्माणदेखि नै संगसंगै रहेका अधिकारीले संगठन निर्माण र विस्तारका लागि विगतमा भएका कामहरुको चर्चा समेत गरे ।

अधिवेशनलाई संस्थापनक अध्यक्ष सुनिलकुमार शर्मा, नेपाल उद्योग बाणिज्य संघका केन्द्रीय सदस्य चक्र अधिकारी लगायतले सम्बोधन गरेका थिए । संघका अध्यक्ष पुरुषोत्तम शर्माको अध्यक्षतामा भएको उद्घाटन कार्यक्रममा अधिवेशन संयोजक ललितकुमार रौनियारले स्वागत मन्तब्य व्यक्त गरेका थिए । कार्यक्रम सञ्चालन गरेका सचिव धु्रब दाहालले सांगठनिक प्रतिवेदन प्रस्तुत गरेका थिए ।

प्रकाशित मिति: शनिबार, माघ २८, २०७९ १५:१६

प्रतिक्रिया दिनुहोस्