यसरी बरामद भएको थियो नेपालगन्जबाट झण्डै ५ करोडको सुन

अर्थ

गृहपृष्ठ
अर्थ
यसरी बरामद भएको थियो नेपालगन्जबाट झण्डै ५ करोडको सुन

यसरी बरामद भएको थियो नेपालगन्जबाट झण्डै ५ करोडको सुन

बिहीबार, वैशाख ७, २०८० बागेश्वरी पोस्ट

नेपालगन्ज । बाँके प्रहरीले नेपालगन्जबाट झण्डै ५ करोड रुपैयाँ बराबरको अवैध सुनसहित दुई जनालाई पक्राउ गरेको छ ।

जिल्ला प्रहरी कार्यालय बाँकेले ४ किलो ९२७.२१८ ग्राम अवैध सुनसहित पक्राउ परेका दुई जनालाई आज पत्रकार सम्मेलनमार्फत सार्वजनिक गरेको हो ।

प्रहरीले सुनसहित पक्राउ पर्ने विराटनगर ९ का ४२ वर्षीय रमेश सोनी र सोही ठाउँका ३६ वर्षीय प्रकाश ठाकुरसहित बरामद गरिएको अवैध सुन सार्वजनिक गरेको हो ।

पक्राउ परेका उनीहरुको साथबाट प्रहरीले सुनका चुरा, ब्रास्लेट, मंगलसूत्र, बाला, ढुङ्ग्री, औँठी लगायत बरामद गरेको जानकारी दिएको छ ।

त्यस्तै उनीहरुको साथमा स्टिमेट बिलको १ थान ठेली, १ थान डिजिटल तराजु, १४ थान विभिन्न मिति र स्थानमा विक्रि गरेको स्टिमेट बिल, एनआइसी एसिया बैंकमा जम्मा गरेको ७ लाख ३३ हजार ४ सय रुपैयाँको भौचर, प्रकाश ठाकुरको नाममा ३ लाख ८६ हजार ४ सय काटेको एनएमबी बैंकको चेक र विभिन्न दरको नोट गरी नगद ३५ हजार बरामद गरिएको बाँके प्रहरीले जानकारी दिएको छ ।

प्रहरीका अनुसार बुधबार राति बरामद गरिएको उक्त अवैध सुनको मूल्य ४ करोड ६९ लाख ५ हजार ७ सय ६३ रुपैयाँ रहेको जनाएको छ । प्रहरीले पक्राउ परेका दुई जनासँग सुनका बारेमा थप अनुसन्धान गरिरहेको जानकारी दिएको छ ।

यसरी बरामद भयो झण्डै ५ करोडको अवैध सुन

बुधबार साँझ नेपालगन्ज बजारमा बाँके बाहिरका दुई जना व्यक्तिले केही मूल्यवान सामग्री बोकेर शंकास्पद तरिकाले हिँडिरहेका छन् भने बिशेष सूचना जिल्ला प्रहरी कार्यालय बाँकेमा जान्छ ।

पहिलेको सूचना प्राप्त भएको केही क्षणमै पुनः बाँके प्रहरीले ती व्यक्तिले ठूलो परिमाणमा अवैध सुन बोकेर हिँडिरहेको भन्ने दोस्रो सूचना प्राप्त गर्छ ।

त्यस पश्चात् जिल्ला प्रहरी कार्यालय बाँकेबाट सादा पोशाकका प्रहरीहरु नेपालगन्ज बजार भरी परिचालन भएर ती दुई शंकास्पद व्यक्तिहरुको खोजीमा हरेक गल्लीहरुमा छरिन्छन् ।

खोजीमा निस्किएका प्रहरीहरुलाई ती व्यक्तिको नाम के हो र उनीहरु कहाँ बसेका छन् भन्ने स्पष्ट जानकारी नपाउँदा धेरै बेर कष्ट हुन्छ, तर पनि बाँके प्रहरी उनीहरुको खोजी गर्न कुनै कन्जुस्याइँ गर्दैन ।

ती दुई व्यक्तिको खोजीमा निस्किएको प्रहरी टोलीलाई अन्ततः राति उनीहरु नेपालगन्ज ४ स्थित न्यू रोडको न्यू इन्द्रेणी होटेलतर्फ भएको अर्को सूचना पुग्दा प्रहरीको टोली त्यस स्थानतर्फ जान्छ।

बाँके प्रहरीको टोलीले अन्ततः ती दुई व्यक्तिलाई आफ्नो नजरमा पार्छ । र, उनीहरुका गतिविधिहरु नियाल्न थाल्छ । शंकास्पद तरिकाले हिँडिरहेका ती दुईसँँग झोला भएपनि त्यति बेला नै उनीहरुलाई नियन्त्रणमा लिन आबश्यक ठान्दैन प्रहरी । बरु प्रहरीको टोलीले उनीहरुको कडा निगरानी गर्दै थप शंकास्पद गतिविधिहरु नियाल्दै पछ्याउन थाल्छ ।

अन्ततः ती दुई शंकास्पद होटलमा पुगे लगत्तै करिब पौने ९ बजेतिर प्रहरीले उनीहरुविरुद्ध धावा बोलेर नियन्त्रणमा लिन्छ । प्रहरीले नियन्त्रणमा लिएर उनीहरुको खानतलासी गर्दा कल्पनै नगरेको सुन बरामद गर्न पुग्छ ।

स्मरणरहोस् : यसअघि पनि तत्कालीन बाँके प्रहरी प्रमुख श्यामकृष्ण अधिकारीको समयमा पनि ४ किलो बढी सुन नेपालगन्ज विमानस्थलबाट बरामद भएको थियो ।

प्रकाशित मिति: बिहीबार, वैशाख ७, २०८० २०:३१