दाङका धनबहादुर मास्की अर्थमन्त्री नियुक्त

अर्थ

गृहपृष्ठ
अर्थ
दाङका धनबहादुर मास्की अर्थमन्त्री नियुक्त

दाङका धनबहादुर मास्की अर्थमन्त्री नियुक्त

सोमबार, जेठ १, २०८० बागेश्वरी पोस्ट

नेपालगन्ज । लुम्बिनी प्रदेश सरकारमा मुख्यमन्त्री डिल्लीबहादुर चौधरीले विना विभागिय मन्त्री धनबहादुर मास्कीलाई आर्थिक मामिला मन्त्रीको जिम्मेवारी दिएका छन् । मास्की बैशाख १५ गते बिना विभागिय मन्त्री बनाइएका थिए ।

गत मंसिर ४ गते भएको निर्वाचनका क्रममा मास्की नेकपा माओबादी केन्द्रबाट दाङको निर्वाचन क्षेत्र नं.३ (२) बाट निर्वाचित भएका थिए । एउटै निर्वाचन क्षेत्र दाङ क्षेत्र नं ३ (१) मा नेपाली काँग्रेसबाट मुख्यमन्त्री चौधरी निर्वाचित भएका थिए ।

त्यतिखेर काँग्रेस, माओबादी सहितका गठबन्धनले साझा उम्मेदवार खडा गरेका थिए भने संयुक्त रुपमा चुनावी अभियान चलाएका थिए ।

एउटै निर्वाचन क्षेत्रबाट निर्वाचन दुई नेता मुख्य मन्त्री र अर्थमन्त्री भएपछि यो निर्वाचन क्षेत्रका मतदाता अब पश्चिम दाङमा बिकासको लहर आउला कि ? भनेर आशाबादी बनेका छन् ।

मुख्यमन्त्री चौधरीले एकै दिन विनाविभागिय मन्त्रीको बनाएका मध्य बर्दियाको २ (२) मा नागरिक उन्मुक्ति पार्टीबाट निर्वाचित धर्मबहादुर चौधरीलाई भौतिक पूर्वाधार मन्त्रीको जिम्मेवारी र रूपन्देहीको ३ (१) मा लोकतान्त्रिक समाजबादी पार्टीबाट निर्वाचित सन्तोषकुमार पाण्डेलाई सहरी विकास मन्त्रीको जिम्मेवारी दिने तयारी गरेको स्रोतले बताएको छ ।

पर्यटन, ग्रामिण तथा सहरी बिकास मन्त्रालय मटुकारेर पाण्डेलाई अन्तिमको सहरी बिकास मन्त्रालय नामांकरण गरि जिम्मेवारी दिन थालिएको स्रोतले जानकारी दिएको छ । मंगलबारसम्म थप दुई नयाँ मन्त्री थपेर चार जनालाई जिम्मेवारी बाँडफाँड गर्ने सोचमा मुख्यमन्त्री रहेको स्रोतले जानकारी दिएको छ ।

मुख्यमन्त्री चौधरीसँगै वैशाख १५ गते तीन मन्त्रीले बिनाविभागीय मन्त्रीका रुपमा शपथ लिएका थिए । आठ दल तथा एक स्वतन्त्र सांसदसमेत गरि ५३ जना सांसदको समर्थनमा वैशाख १४ गते चौधरी मुख्यमन्त्रीमा नियुक्त भएका थिए । उनले बैशाख १९ मा विश्वासको मत लिएका थिए ।

चौधरी नेतृत्वको सरकारलाई नेकपा (एमाले) र राप्रपा बाहेक प्रदेशमा क्रियाशील अन्य सबै दलहरुको साथ सर्मथन छ ।

प्रकाशित मिति: सोमबार, जेठ १, २०८० १३:३०

प्रतिक्रिया दिनुहोस्