उद्योगी व्यवसायीद्वारा प्रधानमन्त्री, अर्थमन्त्री र गभर्नरलाई ज्ञापनपत्र

अर्थ

गृहपृष्ठ
अर्थ
उद्योगी व्यवसायीद्वारा प्रधानमन्त्री, अर्थमन्त्री र गभर्नरलाई ज्ञापनपत्र

उद्योगी व्यवसायीद्वारा प्रधानमन्त्री, अर्थमन्त्री र गभर्नरलाई ज्ञापनपत्र

सोमबार, मंसिर २५, २०८० बागेश्वरी पोस्ट

नेपालगञ्ज । बाँके र बर्दियाका उद्योग वाणिज्य संघ र उद्योगी व्यवसायीका संघसंस्थाले प्रधानमन्त्री, संघीय सरकारका अर्थ मन्त्री र नेपाल राष्ट्र बैंकका गभर्नरलाई ज्ञापनपत्र बुझाएका छन् ।

उद्योग व्यवसायसँग सम्बद्ध चार दर्जन बढी क्रियाशील संघसंस्थाले व्यवसाय तथा व्यवसायी उत्थान संघर्ष समिति गठन गरेर बैंक तथा वित्तीय क्षेत्र उद्योगी व्यवसायीमैत्री बनाउनुपर्ने मागसहित सोमबार जिल्ला प्रशासन कार्यालय बाँकेमार्फत प्रधानमन्त्री र नेपाल राष्ट्र बैंक प्रादेशिक कार्यालय नेपालगञ्जमार्फत अर्थ मन्त्री र गभर्नरलाई १४ बुँदे ज्ञापनपत्र बुझाएका हुन् ।

समितिका संयोजक तथा नेपालगञ्ज उद्योग वाणिज्य संघका अध्यक्ष टंकबहादुर धामी नेतृत्वको टोलीले बाँकेका प्रमुख जिल्ला अधिकारी श्रवणकुमार पोखरेलमार्फत प्रधानमन्त्री पुष्पकमल दाहाल प्रचण्ड र नेपाल राष्ट्र बैंक प्रादेशिक कार्यालय नेपालगञ्जका निमित्त निर्देशक रामकुमार कार्कीमार्फत गभर्नरलाई ज्ञापनपत्र बुझाएको हो । गभर्नरलाई बुझाएको ज्ञापनपत्र अर्थ मन्त्रीलाई बोधार्थ पठाइएको छ ।

ज्ञापनपत्रमा एक अंकको बैंक ब्याजदर कायम गर्नुपर्ने, १५ महिने कोरोनाकालको बेला बैंकलाई तिरेर ब्याज फिर्ता गर्नुपर्ने, बैंक तथा वित्तीय संस्थाले सुरुको सम्झौता अनुसारको ब्याजदर कायम गर्नुपर्ने, १० करोड रुपैयाँ भन्दा माथिको ऋण लगानी गर्दा सम्पत्ति शुद्धिकरणको कागजात अनिवार्य गर्नुपर्ने लगायतका रहेका छन् ।

समितिका संयोजक धामीले आफ्ना मागहरु सुनुवाई नभए चरणबद्ध आन्दोलन गर्ने चेतावनी दिएका छन् । उनले ज्ञापनपत्र बुझाउने क्रममा भने, ‘पहिलो चरणमा हामीले ज्ञापनपत्रमार्फत हाम्रा मागहरु प्रस्तुत गरेका छौं । माग सम्बोधन नभए चरणबद्ध आन्दोलन गर्नेछौं ।’ संघर्ष समितिले विरोधमा कालोपट्टि बाँध्ने, अनसन बस्ने र व्यवसायी सभा गर्ने तयारी गरिरहेको छ ।

प्रकाशित मिति: सोमबार, मंसिर २५, २०८० २१:०६

प्रतिक्रिया दिनुहोस्