माता बागेश्वरी बचत तथा ऋण सहकारी संस्थाको साधारणसभा सम्पन्न

अर्थ

गृहपृष्ठ
अर्थ
माता बागेश्वरी बचत तथा ऋण सहकारी संस्थाको साधारणसभा सम्पन्न

माता बागेश्वरी बचत तथा ऋण सहकारी संस्थाको साधारणसभा सम्पन्न

शनिबार, पुस २८, २०८० बागेश्वरी पोस्ट

नेपालगन्ज । माता वागेश्वरी वचत तथा ऋण सहकारी संस्था लिमिटेडले चालू आर्थिक वर्ष ०८०–०८१ मा सात करोड वचत गर्ने लक्ष्य लिएको छ । शनिवार नेपालगन्जमा भएको संस्थाको १३औँ वार्षिक साधारण सभामा प्रवन्धक लक्ष्मी काफ्लेले आर्थिक वर्ष ०८०–०८१ मा सात करोड वचत गर्ने लक्ष्य लिएको जानकारी दिइन् । आव ०७९–०८० सम्म पाँच करोड २५ लाख ९६ हजार ३७९ रुपैयाँ वचत रहेको उक्त संस्थाले चालू आवमा ६ करोड २५ लाख ३५ हजार ६ सय रुपैयाँ ऋण लगानी गर्ने लक्ष्य लिएको छ । गत आवमा पाँच हजार ५४ जना शेयर सदस्य रहेको माता वागेश्वरी वचत तथा ऋण सहकारी संस्था चालू आवमा पाँच हजार सात सय शेयर सदस्य पुर्याउने लक्ष्यका साथ अगाडि बढेको छ ।

संस्था चालू आवमा एक करोड ७५ लाख ४४ हजार ५६६ रुपैयाँ आम्दानी गर्ने गरी अगाडि बढेको बताउँदै उनले संस्थासँग १० लाख ३६ हजार ८८१ रुपैयाँ सम्पत्ति रहेको बताइन् । माता वागेश्वरी वचत वचत तथा ऋण सहकारीका अध्यक्ष रसिद अहमद कुरैसीले सहकारीसँग ८८ लाख ७५ हजार शेयर पुञ्जी रहेको जानकारी दिए । उनले ३३ लाख १८ हजार ७४५ रुपैयाँ जगेडा तथा अन्य कोषमा रहेको बताउँदै आठ लाख २२ हजार २२० रुपैयाँ बैँकमा मौज्दात रहेको बताए ।

उनले सहकारी ऐन, नीति, नियम र परिधिभित्र रहेर सहकारी संचालन गरेको बताउँदै वचतकर्ताको रकम सुरक्षित गर्न सहकारीले दृढ संकल्प लिएको स्पष्ट पारे । नियमित लेखा परीक्षण गरी सहकारीलाई पारदर्शी बनाएको दावी गर्दै अध्यक्ष कुरैसीले शेयर सदस्यको सहभागितामा साधारणसभा गर्दै आएको जानकारी दिए ।

प्रमुख अतिथि लुम्विनी प्रदेशका कृषि तथा भूमि ब्यवस्था मन्त्री भण्डारीलाल यादवले सहकारीप्रति जनताको विश्वास घट्दै गएकोले पारदर्शी भएर सहकारी संचालन गर्न आग्रह गरे । माता वागेश्वरी वचत तथा ऋण सहकारीले जिल्लामै उत्कृष्ट काम गरेको बताउँदै उनले वचतकर्ताको रकम सुरक्षित राख्न सके मात्र जनताको विश्वास बढ्ने बताए । ‘जनताको पैसा खाएर सहकारी भागेको भन्ने सुनेर सहकारीप्रति वचतकर्ताको विश्वास घट्दै गएको छ । जनतालाई विश्वास दिलाए मात्र सहकारी संचालन गर्न सकिन्छ,’ उनले भने ।

नेपालगन्जका उपमेयर कमरुद्धिन राईले सहकारीले तल्लोस्तरका नागरिकलाई समेटेको बताउँदै आफ्नो गास काटेर वचत गरेको रकमको सुरक्षा गर्ने दायित्व सहकारीको भएको बताए । उनले सहकारीको लक्ष्य र उद्देश्य अनुरुप काम गर्न आग्रह गर्दै आगामी दिनमा अझ राम्रो काम गर्न सुझाव दिए । सो अवसरमा सहकारी बैँकका केन्द्रिय संचालक समितिका सदस्य विजया धिताल, सहकारी वैँक नेपालगन्जका प्रवन्धक प्रकाश थपलिया, जिल्ला वचत तथा ऋण सहकारी संघका प्रमुख हिरा खराल, सन नेपाल इन्स्योरेन्सका प्रवन्धक कमल शाही लगायतले सहकारीको बारेमा विचार राखेका थिए ।

प्रकाशित मिति: शनिबार, पुस २८, २०८० २२:३७