नेपालगञ्ज उद्योग बाणिज्य संघले सोध्यो महासचिवलाई स्पष्टीकरण

अर्थ

गृहपृष्ठ
अर्थ
नेपालगञ्ज उद्योग बाणिज्य संघले सोध्यो महासचिवलाई स्पष्टीकरण

नेपालगञ्ज उद्योग बाणिज्य संघले सोध्यो महासचिवलाई स्पष्टीकरण

बुधबार, साउन ९, २०८१ बागेश्वरी पोस्ट

नेपालगञ्ज । नेपालगञ्ज उद्योग बाणिज्य संघका महासचिव भिम बहादुर रानाभाटलाई स्पष्टीकरण सोधिएको छ । संघको कार्यसमिति बैठकको निर्णय अनुसार अध्यक्ष टंक बहादुर धामीले महासचिव रानाभाटलाई स्पष्टीकरण सोधेका हुन् । कार्यसमितिको बैठकमा जानीजानी अनुपस्थित रही असहयोग गर्नुका साथै बैठकको जानकारी पत्र समेत बुझ्न इन्कार गर्दै पदीय मर्यादामा नरही विधान प्रतिकूल कार्य गरेको ठहरसहित रानाभाटलाई स्पष्टीकरण सोधिएको हो ।

May be an image of ticket stub and text

नेपालगञ्ज उद्योग बाणिज्य संघको विधानको दफा २९ (ठ) बमोजिम पत्र प्राप्त गरेको मितिले तीन दिनभित्र लिखित स्पष्टीकरण पेश गर्न भनिएको छ । उक्त अवधिभित्र स्पप्टीकरण पेश नगरेमा वा पेश गरेको स्पष्टीकरण र प्रमाणहरु सन्तोषजनक नदेखिएमा विधान बमोजिम कारबाही हुने स्पष्टीकरण सोधिएको पत्रमा उल्लेख छ । श्रावण ८ गते बसेको संघको बैठक नम्बर १६ को विविध अन्तर्गत निर्णय नम्बर ३ अनुसार रानाभाटले विधान प्रतिकूल कार्य गरेको कार्यसमिति बैठकको ठहर छ । निर्णय नम्बर ३ मा "संघका वर्तमान महासचिव श्री भिमबहादुर रानाभाटको कार्य सम्पादन, आचारण र ब्यवहारको सम्बन्धमा आजको कार्यसमिति बैठकमा छलफल हुँदा महासचिवज्यूलाई बैठकको सम्बन्धमा पठाइएको पत्र समेत बुझ्न समेत इन्कार गर्नुभएको र कार्यसमितिको बैठकमा समेत जानीजानी अनुपस्थित रही संघको काम कारबाहीमा सहयोग नगरी गम्भीर असर पारेको भन्ने देखिन आएको हुँदा सो सम्बन्धमा निज महासचिवबाट लिखितरुपमा विधानको दफा २९ (ठ) बमोजिम लिखित स्पष्टीकरण माग गर्ने निर्णय गरियो" भन्ने छ ।

निर्वाचित भएदेखि नै रानाभाट विवादित छन् । निर्वाचन समितिले उनलाई जबर्जस्ती (केही मत गणना गर्न बाँकी रहँदै) विजयी भएको घोषणा गरेको भन्दै त्यसमा असहमति जनाउँदै महासचिवका प्रत्यासी टंक प्रसाद शर्माले अदालतमा मुद्दा दायर गरेका छन् । त्यसको अन्तिम छिनोफानो हुन अझै बाँकी छ ।

प्रकाशित मिति: बुधबार, साउन ९, २०८१ २१:४५