लकडाउनले बदलिएको जीवनशैली

बिचार

गृहपृष्ठ
बिचार
लकडाउनले बदलिएको जीवनशैली

लकडाउनले बदलिएको जीवनशैली

शुक्रबार, असोज २३, २०७७ बागेश्वरी पोस्ट

निशा सुनार

निशा सुनार

विश्वव्यापीरुपमा रहेको नोवेल कोरोना भाइरस एक महामारीकारुपमा फैलिएको छ । कोरोना महामारी फैलिन नदिन र महामारी विरुद्ध लड्न आवश्यक तयारीका लागि लामो समय देशभर लकडाउन भयो । लकडाउनको कारण हाम्रो जीवन शैली बदलिएको छ । कोरोनाका कारण हामीले दैनिकरुपमा गर्ने क्रियाकलाप पनि रोकियो । कोरोनाको संक्रमण अझै तीब्र गतिमा बढिरहेकाले अहिले पनि हामी घरमै बसेका छौं ।

यो परिस्थिति आउनुअघि म सधैं बिहान ४ बजे उठ्ने गर्थे । हातमुख धोएर पढ्न बस्थें । पढिसकेपछि आमालाई घरको काममा सघाइसकेपछि स्कुल जाने गर्थे । तर, अहिले मेरो दिनचर्या धेरै परिवर्तन आइसकेको छ । म बिहान ४ बजे उठ्ने मान्छे, अहिले ८ बजे उठ्ने गर्दछु । मलाई आमाबाबाले पहिला बिहानै उठेर पढ्नुपर्छ भन्नुहुन्थ्यो । स्कुल समयमै जानुपर्छ भनेर पनि विहान उठाउनुहुन्थ्यो । अहिले चाहिँ केही काम छैन भनेर उठाउनु हुँदैन । अहिले म मज्जाले सुत्ने गर्छु । यदि लकडाउन नभएको भए म हाइसञ्चो भएर सुत्न पाउँदैन थिएँ ।

मलाई पहिला गाउँमा बिहानै उठ्छिन्, पढ्छिन्, आमालाई कामकाजमा सघाउँछिन्, समयमै स्कुल जान्छिन् भन्ने गर्थे । तर, आजभोलि कसैले पनि भन्ने गर्दैनन् । साँच्चै नै मलाई लकडाउनले धेरै परिवर्तन गराएको छ । लकडाउनका कारण मेरो खानपिन लत्ताकपडामा पनि परिवर्तन आएको छ । म पहिला ९ बजे खाना खाने गर्थें । अहिले म खाना १२ बजे खाने गर्दछु । पहिला हामी स्वास्थ्यका लागि बिभिन्न किसिमको पोषणजन्य खाना खाने गर्थिउँ तर अहिले कोराना संक्रमणका कारण सबै किसिमको खाद्यपदार्थ सजिलै नपाउँदा वा किनमेल गर्ने वातावरण नहुँदा समस्या भोगिरहेका छौं ।

लकडाउनकै बीचमा मेरो गाउँ नजिकै एक जना हामी जस्तै किशोरीको यौन शोषण हुन लागेको थियो तर पनि मैले लकडाउनका कारण त्यहीँ गएर केही कुरा बुझ्न, सोधपुछ गर्न पाएनँ, मलाई धेरै दुःख लाग्यो । त्यो कुरा सुनेर हामी जस्तै किशोरीलाई अन्याय हुँदा पनि म सहयोग गर्न त्यहाँ सहभागी हुन पाइनँ । हाम्रो गाउँमा एक जना मानिसलाई कोरोनाको लक्षण देखा पर्दा त झन् आमाबावाले घर बाहिर नै जान दिनुहुँदैनथ्यो । नेपाल सरकारको नियमको पालना गर्नुपर्छ भन्नुहुन्थ्यो । त्यसैले हामीले पनि पालना गरिरहेका छौं । लकडाउनले हामीलाई धेरै परिवर्तन गराइदिएको छ । यो अवस्थामा हामीले कसैलाई दुःख पर्दा पनि केही गर्न सकिरहेका छैनौं । हिम्मत र उत्साहले हिँडिरहेको मान्छे म सयौं पटक पाइला चिप्लिएर के भो.....लडेर पनि उठ्न जानेको मान्छे म भन्ने गर्थे । तर, कोरोना महामारी, लकडाउनले गर्दा हामी एउटा बन्धनमा परेका छौं । कोरोनाका कारण बदलिएको जीवनशैलीले सबै मानिसलाई परिवर्तन गराएको छ । हामी सुरक्षित छौं ।

हामी जस्तै कैयौं किशोरी लकडाउनका कारण सुरक्षित छैनन् । धेरै भन्दा धेरै बलात्कारका घटनाहरु दिनदिनै बढ्दै गएका छन् । यस्तो समयमा हामी सुरक्षित भएपनि हामी जस्तै कैयौं किशोरीहरु कोही मामा घर गएका होलान्, कोही अण्टीको घर....लकडाउनले गर्दा आफ्नो घर जान पाएका छैनन् । तिनीहरु पनि सबै सुरक्षित छन् भन्ने छैन । लकडाउनले गर्दा कैयौं किशोरीमा पनि जीवनशैली बदलिएको छ ।

म कहिलेकाहीँ एक्लै कोठामा बस्दा सोच्ने गर्छु–मेरो गाउँमा एकदमै समस्या देखा परेको छ । जुन मानिसहरु साँझ बिहान काम गरेर आफ्नो जिविकोपार्जन गरेर खाने गदर्थे । ती मानिसहरुलाई लकडाउनले गर्दा खानका लागि हाहाकार मच्चिएको छ । यस्तो देखेर पनि हामीले केही सहयोग गर्न सकेका छैनौं । तिनीहरुमा कति धेरै पीडा समस्या देखिएको छ ।

नोवेल कोरोना भाइरसको कारण हाम्रो जाँच भएको छैन । लकडाउन भएकोले हाम्रो जीवनशैली नै बदलिएकाले नेपाल सरकारले विद्यार्थीको भविष्यलाई मध्यनजर गर्दै अनलाइन कक्षा सुरु गरेपनि म गाउँमा बस्ने भएकाले पढाईबाट बञ्चित हुनु परेको छ । लकडाउन भएपनि हामी सुरक्षित हुन सकेका छैनौं । लकडाउनका कारण बिभिन्न थरीका समस्याहरु देखा परेका छन् । जस्तै–बालयौन दुव्र्यवहार, महिला हिंसा, बालबालिकामा हुने हिंसा, यौन दुव्र्यवहार लगायत धेरै रहेका छन् ।

त्यसैगरी एक दिन साँझको बेला थियो । म खाना खाएर आमालाई केही काममा सघाइरहेको थिएँ । त्यतिबेला मेरो छिमेकीमा ठूलो आवाज आयो । मैले काम छाडेर के भयो भनेर सुनें । त्यहाँ त झगडा भएको पो रहेछ । कुरा बुझ्दै जाँदा श्रीमानले श्रीमतीलाई बेसरी पिटेका थिए । यसरी नै उनले दिनदिनै टर्चर पनि गरिरहेका हुन्थे । शारीरिक र मानसिकरुपमा धेरै टर्चर गर्थे । जति झगडा गरेपनि पिटे पनि अहिलेको समयमा लकडाउनमा प्रहरी आउँदैनन् । यस्तो समयमा प्रहरीले नि लग्दैनन् भनिरहेका थिए । अर्को दिन पनि यसैगरी झगडा गर्न थाले । ती महिलालाई धेरै पीडा भएको थियो । त्यो सबै बुझ्दा त्यहाँ महिला हिंसा भएको रहेछ । तर पनि म छिमेकी भएर यस्तो लकडाउनको समयमा केही पनि गर्न नसक्दा टुलुटुलु हेर्न बाध्य थिएँ । मेरो छिमेकीमा त यस्तो महिला हिंसा देखिएको छ । लकडाउनका बेला यसरी नै अरु कति ठाउँमा महिला हिंसा भयो होला भनेर मैले धेरै सोचें ।

(अन्तर्राष्ट्रिय बालिका दिवसको अवसरमा प्लान इन्टरनेशनल नेपालको डिजिटल टेक ओभर कार्यक्रम अन्तर्गत् बाँकेको खजुरा गाउँपालका वडा नम्बर ४ बुद्धपुरकी किशोरी निशा सुनार एक दिनको लागि यस अनलाइन पोर्टलको अतिथि सम्पादक हुनुहुन्छ)

प्रकाशित मिति: शुक्रबार, असोज २३, २०७७ १६:००

प्रतिक्रिया दिनुहोस्